తెలంగాణ జనసేనకు ‘గడల’ బలం!

సామాన్యుడి అస్త్రం / సిటీ బుర్యో : తెలంగాణలో పార్టీని సంస్థాగతంగా మరింత బలోపేతం చేసే దిశగా జనసేన కీలక నిర్ణయం తీసుకుంది. పార్టీ తెలంగాణ రాష్ట్ర ఆర్గనైజింగ్‌ సెక్రటరీగా డాక్టర్‌ గడల శ్రీనివాసరావును నియమించింది. ఈ మేరకు జనసేన పార్టీ తెలంగాణ విభాగం శనివారం అధికారిక ప్రకటన విడుదల చేసింది.

రాష్ట్రంలో జనసేనకు గ్రామస్థాయి నుంచి పటిష్ఠమైన నిర్మాణాన్ని ఏర్పాటు చేయడం, పార్టీ శ్రేణుల మధ్య సమన్వయాన్ని పెంచడం, జిల్లాలు–నియోజకవర్గాల వారీగా సంస్థాగత కార్యక్రమాలను విస్తరించడం లక్ష్యంగా ఈ నియామకం చేపట్టినట్లు పార్టీ తెలిపింది. కొత్త బాధ్యతల్లో డాక్టర్‌ గడల శ్రీనివాసరావు కీలకంగా వ్యవహరించనున్నట్లు పేర్కొంది.

తెలంగాణ ఆరోగ్యశాఖ పరిధిలో రాష్ట్ర హెల్త్‌ డైరెక్టర్‌ హోదాలో పనిచేసిన అనుభవం ఆయనకు ఉందని జనసేన తన ప్రకటనలో వెల్లడించింది. ప్రత్యేక పరిపాలనా బాధ్యతలను విజయవంతంగా నిర్వహించిన అనుభవం పార్టీ నిర్మాణానికి ఉపయోగపడుతుందని నాయకత్వం భావిస్తోంది. ప్రభుత్వ వ్యవస్థలో ఆయనకు ఉన్న పరిపాలనా అనుభవంతో పార్టీ కార్యక్రమాలను క్షేత్రస్థాయికి తీసుకెళ్లడంతో పాటు శ్రేణులను సమన్వయం చేసే అవకాశం ఉంటుందని అంచనా వేస్తోంది.

తెలంగాణ రాజకీయాల్లో సంస్థాగతంగా విస్తరించేందుకు ప్రయత్నిస్తున్న జనసేనకు ఈ నియామకం కీలకంగా మారనుంది. ఇప్పటివరకు రాష్ట్రంలో పరిమిత కార్యక్రమాలకే ఎక్కువగా కనిపించిన పార్టీ.. ఇకపై గ్రామ, మండల, జిల్లా స్థాయిలో కార్యకలాపాలను వేగవంతం చేయాలనే వ్యూహంతో ముందుకెళ్తున్నట్లు తాజా నిర్ణయం స్పష్టం చేస్తోంది.

డాక్టర్‌ గడల శ్రీనివాసరావు నియామకంతో పార్టీ సంస్థాగత కార్యక్రమాలకు కొత్త ఊపు వస్తుందని, నాయకులు–కార్యకర్తల మధ్య సమన్వయం మరింత మెరుగుపడుతుందని జనసేన నాయకత్వం ఆశాభావం వ్యక్తం చేసింది. తెలంగాణలో జనసేనను రాజకీయ ప్రత్యామ్నాయ శక్తిగా తీర్చిదిద్దే ప్రయత్నాల్లో ఆయన సేవలు కీలకంగా నిలుస్తాయని పేర్కొంది.