లింగంపల్లి స్టేషన్‌లో గంజాయి కలకలం.. 23 కిలోలు పట్టివేత!

సామాన్యుడి అస్త్రం / లింగంపల్లి : లింగంపల్లి రైల్వే స్టేషన్ వద్ద భారీ మొత్తంలో గంజాయి పట్టుబడటం కలకలం రేపింది. డిస్ట్రిక్ట్ టాస్క్‌ఫోర్స్ బృందం చేపట్టిన తనిఖీల్లో ఇద్దరు వ్యక్తుల వద్ద సుమారు 23 కిలోల గంజాయి లభించినట్లు అధికారులు గుర్తించారు. వెంటనే గంజాయిని స్వాధీనం చేసుకుని ఇద్దరినీ అదుపులోకి తీసుకున్నారు.

పట్టుబడిన వారిని ముంబైకి చెందిన రహ్మతుల్లా ఖాన్, రషీద్లుగా గుర్తించినట్లు సమాచారం. అధికారులు తెలిపిన ప్రాథమిక వివరాల ప్రకారం.. వీరు ఒడిశాలో గంజాయిని కొనుగోలు చేసి హైదరాబాద్‌కు అక్రమంగా తరలిస్తున్నట్లు విచారణలో గుర్తించారు. లింగంపల్లి రైల్వే స్టేషన్ ప్రాంతంలో తనిఖీలు నిర్వహిస్తున్న సమయంలో వీరి కదలికలపై అనుమానం రావడంతో టాస్క్‌ఫోర్స్ సిబ్బంది తనిఖీ చేయగా గంజాయి బయటపడినట్లు సమాచారం.

గంజాయిని ఎక్కడ కొనుగోలు చేశారు? హైదరాబాద్‌లో ఎవరికి అందించాల్సి ఉంది? దీని వెనుక మరికొందరి పాత్ర ఉందా? గతంలోనూ ఇదే మార్గంలో గంజాయి తరలించారా? అనే కోణాల్లో అధికారులు ఆరా తీస్తున్నట్లు తెలుస్తోంది.

పట్టుబడిన గంజాయిని స్వాధీనం చేసుకున్న అధికారులు ఇద్దరు నిందితులను అరెస్ట్ చేసి, తదుపరి విచారణ నిమిత్తం శేరిలింగంపల్లి ఎక్సైజ్ స్టేషన్‌కు తరలించారు. ఈ వ్యవహారానికి సంబంధించిన సరఫరా గొలుసు, ఇతర వ్యక్తుల ప్రమేయంపై విచారణ కొనసాగుతోంది.