- మెట్రో స్టేషన్‌ సమీపంలో ట్రాఫిక్‌ పోలీసుల తనిఖీల్లో గుర్తింపు
- పార్క్‌ చేసిన వాహనాల్లో చోరీకి గురైన ‘హీరో ప్లెజర్‌’
- మియాపూర్‌ పోలీసులకు సమాచారం.. వాహనం అప్పగింతకు ఏర్పాట్లు
సామాన్యుడి అస్త్రం / మియాపూర్‌ : మెట్రో స్టేషన్‌ దగ్గర పార్క్‌ చేసి ఉన్న స్కూటర్‌.. చుట్టుపక్కల దానికి సంబంధించిన వారెవరూ కనిపించలేదు. ట్రాఫిక్‌ పోలీసులు తనిఖీ చేయగా అది చోరీకి గురైన వాహనమని తేలింది. మియాపూర్‌ మెట్రో స్టేషన్‌ సమీపంలో శుక్రవారం సాయంత్రం నిర్వహించిన వాహన తనిఖీల్లో ఈ విషయం బయటపడింది.
మియాపూర్‌ ట్రాఫిక్‌ ఇన్‌స్పెక్టర్‌ తెలిపిన వివరాల ప్రకారం.. వాహన తనిఖీల్లో భాగంగా, సమీపంలో ఎవరూ లేకుండా పార్క్‌ చేసి ఉన్న వాహనాలను పోలీసులు పరిశీలించారు. వాటిలో ‘హీరో ప్లెజర్‌’ స్కూటర్‌ చోరీకి గురైనట్లు గుర్తించారు. ఈ వాహనానికి సంబంధించి మియాపూర్‌ పోలీస్‌స్టేషన్‌లో ఇప్పటికే క్రైమ్‌ నంబర్‌ 1001/2026, బీఎన్‌ఎస్‌ సెక్షన్‌ 305(b) కింద కేసు నమోదై ఉన్నట్లు తెలిపారు.
వాహనాన్ని గుర్తించిన విషయాన్ని మియాపూర్‌ డిటెక్టివ్‌ ఇన్‌స్పెక్టర్‌కు తెలియజేశారు. తదుపరి చర్యల కోసం స్కూటర్‌ను మియాపూర్‌ పోలీసులకు అప్పగించనున్నట్లు ట్రాఫిక్‌ ఇన్‌స్పెక్టర్‌ పేర్కొన్నారు.
